Lagaw sa York Wildlife Kingdom ni Elma ‘Nenen’ Ayson-McKeown

Agosto 05, 2014, adlaw nga Martes, aga pa kami nagbugtaw kag maghanda bantay kay Jack kag sa amiga na nga si Amy. Hapitun nanda kami, imaw kami malagaw pa-York, Maine. Sobra darwa ka oras ang dalagan kang sarakyan halin sa balay pa-York. Naghapit anay kami sa balay ni Jack tungud may nalipatan darhun: ang cooler nga may soda. Naghapit man kami anay sa gasolinahan kag magabuta ka tangke sa Cumberland Farms. Dalagan uli ang sarakyan, kag may freight train kami nga naagyan. Kanami lang gid lantawun kag pamatian ang huni kang malawid nga train. Manami ang panahon, komportable sa 70 degrees F; indi mainit kag kalma ang hangin.

Sa Highway Interstate 95 (I-95 Maine) pa south, may nalampasan kami nga aksidente. May pulis kag ambulansya.‘Kabay nga wara lang ti napatay,’ kuon ko samtang nagabalikid ako sa amo nga aksidente. Duro ang amun gin-agyan: ang Sabattus, Lewiston, Auburn, Gray, Jay, New Gloucester, Falmouth, South Portland, Scarborough, Saco, Biddeford, Kennebunk, Wells kag York. Apat ka istasyonan kang toll pay ang amun gin-agyan kag $3 ang kada bayad para sa kotse. Mayad lang may GPS man gid ang sarakyan. Pero nagtalang man kami kisra. Salamat kag nag-abot man kami nga wara man ako nagsuka-suka.

Sobra ka trapik ang paradahan. Duro mga sarakyan kay duro mga tawo: bata kag mal-am ang gapangalipay maglantaw bisita sa dyang animal zoo. Malawid ang nagapila, duro mga tawo pila man gid kami nga anum tag $14.75 ang bayad kada isara sa entrance para sa adults kag $7 ang sa mga kabataan. Mas mahal ang entrance pay rugya sangsa pag-agtu namun sa Gray Maine Wildlife Park. Ok lang kuon ko, ‘Akun tanan ang gastos basta tawas ako.’ Amo ria ang kuon ko kananda. Masadya kami kag pagsulud gin-welcome kami kang Bear nga estatwa.

Ang mga monkey ang una namun ginlantaw. Masinadyahun sanda nga nagpakita ka andang talento: mag-swing kag magkanta. Gahud ang pag-ho ho kag wo wo nanda. Sa amun pagsugata ka mga duck, gaparapit sanda nga gusto ipakan-un. Ang mga baboy, daragkul nga bao, peacock, sari-sari nga mga owl, parrot, canure, ostrich kag duro pa nga kapispisan nga indi ko madumduman ang mga ngaran. May mga bob cat, lynx, butterflies (dya ako nawili gid maglantaw kag magbuol ka litrato), deer, zebra, snake, lizard, buwaya, goat, llama, camel kag duru pa nga mga wildlife animal. Nagpanglitrato ako sa akun camera. Wara magtunga-tunga ka ralantawun, napatay run ang baterya. Grrrr man gid ako eh pero mayad man ang mga kaimaw ko may mga camera amo nga nakapadayon ako sa paglitrato kananda. Kanami lang lantawon ang mga sapat. Ang iba nami man gid ikaptan. Kon puwede lang kay sanda man nagaparapit nga gusto magkaun. Ang katapusan nga ginhimo ka mga bata amo ang pagsakay sa bangka, sa foot paddle, palibot-libot sa katubigan. Duro ang mga duck nga galangoy langoy. Masadya lang lantawun kay nami mga harakhak nanda.

Bag-o magguwa, nagsulud kami sa souvenir shop. Pero wara man gid kami ti ginbakal kay magastos lang rian kag mahal. Balik kami sa paradahan, ay abaw, sobra kainit. Ginbuksan namun anay ang van para mahaganhagan ang init.May tubig kag soda nga maramig nga nagpahaganhagan man kang amun kauhaw. Nagplano kami makaun sa kon diin nga baratuhon lang nga restaurant. Inang indi magsobra sa $10 ang bili. Botohan kami nga anum kon sa diin? Wendy’s ang nagustuhan. Gingamit namun ang GPS para sa direksyon kang pinakamarapit nga Wendy’s.

Ay sus, sige dalagan ka sarakyan pero wara pa kami nakakita ka Wendy’s. Naagyan run namun ang Ogunquit, Berwicks kag Kittery hasta na lang nalampasan namun ang Trading Post sa southbound Kittery. ‘Sige lang ah padayon padalagan makita natun man gid ria ang Wendy’s,’ kuon ko. Gutom run kami nga anum. Ay sus, pasulud run gali kami sa border kang New Hampshire. Naagyan namun ang tulay nga Piscatagua River Bridge nga nagakonekta kang Portsmouth, New Hampshire kag Kittery, Maine. Makita ang Portsmouth Naval Shipyard nga may daragkul nga mga barko.

Padayon padalagan sa Portsmouth, New Hampshire kag rugto run kami nakakita ka Wendy’s. Masadya man gid kami tanan. Nagsulud kami kag nag-order. Abaw, $58.09 ang total bill. Okey lang, masadya man kami tanan nga nagkinaun. Kag samtang nagakaun, may nakita ako nga bayi nga nagapungko, may imaw. Siguro man gid empleyado sanda nga darwa. Sa isip ko, daw Pilipina man gid haw? Nagyuhum ako kana kag nagyuhum balik man kanakun. ‘Pilipina ikaw?’ Pamangkot ko. ‘Huod,’ sabat na, kag nagkitaay kami sa tunga kag magkupkupanay. Sus timo, Bisaya man gali! Taga Tacloban, Leyte tana pero ang bana na taga Miag-ao kag San Remegio, Antique. Mga Sumalinog nga pamilya. Masadya gid nga nagkilalahay kami. Ginhambal ko man nga taga-Patnongon ako. Kuon na nakauli man gid sanda sa Patnongon, rugto marapit sa Hacienda Salvani. Kilala na man ang mga paryenti kag mga tawo nga nakilala ko man kag natadaan, parehas kang konduktor kang Lupad Puti nga si Nonoy Sale kag asawa na nga si Aida. Kanami lang ang amun pag-istoryahanay. Sa urihi nagtugruay kami kang ngaran, address kag telepono. Tana si Elizabeth kag ginpakilala ko man tana sa akun mga kaimaw nga sanday Louis, Matthew, Chelsea, Jack kag Amy. Masadya man gid kami nga daw buhay run kami nga nagkakilalahanay. Kag nagkupkopanay ruman hasta pagguwa sa Wendy’s.

Pagbalik namun, naghapit kami sa Scarborough sa balay kang amiga ni Jack nga si Amy. Nagpakilalahay kami sa Nanay ni Amy. Nagpahuway-huway anay kami mga trenta minutos bag-o magpadayon padalagan ka sarakyan. Naghapit ruman kami sa Dunkin Donuts sa diin si Jack naga-obra. Ginpakilala na man kami sa ana mga kaimaw kag may libre nga sangka dosena nga donuts kag hot chocolate kami. Salamat gid! Sa amun gin-agyan, naghapit kami sa Hannaford Food Market. Raad mamakal ka mga pagkaun pero nagbaylo ang isip hay gusto pa namun magpa-Japanese Restaurant kag mga isara pa ka oras dya kag malab-ot namun. Mainitan lang ang pagkaun sa sulud kang sarakyan kag marangga. Gusto ko abi nga makaun kami sa Hokkaido Japanese Restaurant hay buhay run wara ako makakaun kang Japanese food. Mga alas dyes run sa gabi-i. Ay ti, nakahambal liwan ako Hinapon: Konbanwa, domo arigato, sayonara, kag iba pa. Buffet style kag eat all you can!

Bag-o kami magsakay liwan, nagpanaw-panaw anay kami para ma-burn ang colories. May Hannaford marapit. Ginpanaw namun kag mamakal. Pasado alas onse run kami makaabot sa balay. Kapoy gid, nga nagdiretso ako sa kama sa pagpahuway. Salamat nga wara ako magsuruka. Salamat gid sa Ginuo sa matawhay kag masadya nga byahe namun kang mga bata!