Salamat kananday Ma’am kag Sir

Barasanan Elementary School, Barasanan B, Dao, Antique [1986-1992]:

Grade 1, Salamat kay Ma’am Imelda Rubite. Sa idalum kang narra kag kaimito sa guwa kang klasrum, naga-oral reading kami pagkatapos igma. A, e, i, o, u. Nami ang dapya kang hangin. Ingud ako ni Ma’am, hay aram ako nga bata [:)], kag para makapirung-pirung si Ma’am sa dapulay kang hangin.

Nagapa-oral reading ako sa akun mga klase kadya sa kolehiyo. Dramatic reading kang excerpt kang mga istorya kag nobela nga amun ginabasa. Sa klase namun sa binalaybay, may Poetry Recital. Kada isara gasaulo ka paborito nanda nga binalaybay sa napili nanda nga mamalaybay sa pungsod kag sa nagkalain-lain nga rehiyun kang kalibutan. Ipasundayag nanda dya sa tunga. Sadya dya pirme kag duro ang positibo nga rebelasyon sa mga ikasarang kang mga estudyante. Padayon nga epektibo ang oral reading sa pagtuon.

Grade 2, Salamat kay Ma’am Estrella Cepe. Ang daw wara it katapusan nga pamunot para maghining-hining ang salug nga semento ang indi ko malipatan sa Grade 2! Kalimpyo kag ang importansya kang kaanyag ang isara sa madumduman ko nga natun-an kay Ma’am Cepe. Nangin pet na ako, gindara sa banwa, kag sa pauli kag paagto, duro akun nadarawat nga mga leksyon sa kabuhi.

Grade 3, Salamat kay Ma’am Candelaria Vergara. Jack stone ang indi ko malipatan sa Grade 3, sa sagwa kang klasrum, pagkatapos igma. Kag ang pagtindug ni Ma’am Vergara sa tunga, sa atubangan kang blackboard, may kaput nga labug nga stick. Ginapabasa man kami. Dasig run kami magbarasa. Dumduman ko ang leksyon sa subject-verb agreement kag ang pagpasulat kanamun sa blackboard – fill-in the blank. Nagahibi si Ma’am sa kadungol ka pira ko ka mga klasmeyt. Sunlog gani kana, nagra-laon run sa pagtudlo. Sinsero ang mga luha kag ugtas ni Ma’am para sa amun kaaraydan.

Napadar-an ko ka Christmas card si Ma’am sa mga una nga tinuig kang akun pag-obra bilang manunudlo man.

Grade 4, Salamat kay Ma’am Zenaida Malacad. Science Quiz Bee hasta sa Division Level kag Acceleration Test hasta sa Regional Level! Sa kada bes, ang pag-coach kanakun ni Ma’am. Kag bangud rayu amun balay sa banwa, sa balay nanda ako gahingga. Halin sa isuksok ko nga bayo, sapatos, medyas, ginaseguro dya ni Ma’am nga mayad. Gindapulay na ako, gin-ananay sa tagsa ka halintang.

Grade 5, Salamat kay Sir Luis Mifuel. ‘What song do you like to sing?’ Sa dya nagaumpisa ang amun klase sa aga kag pagkatapos igma. Duro ang kanta nga gintudlo kanamun ni Sir. Mga Espanyol. Cuando, cuando nga indi ko run masugpunan, pati ang mga ‘lumabay-labay nga daw aso’ kag ang ‘Dear Clementine.’ Parangara si Sir Luis [kaluoyan ang ana kalag], ilabi na sa mga mango. Indi ko man malipatan ang Current Events nga parte kang klase namun, diin natun-an ko kag nakilala ang mga personalidad parehas ni Saddam Hussein kag ang giyera sa Middle East katung 1991, amo nga bata pa lang, nangin interesado run ako sa mga nagakaratabo sa sosyodad kag wara nangin manul.

Grade 6, Salamat kay Ma’am Jazmin Josue.‘I Have a Dream’ kang ABBA ang gintudlo kanamun ni Ma’am para mangin closing song. Antes rugya, ang pagpalaoy-laoy namun sa ‘Heal the World.’ Ginbatiti man ako ni Ma’am sa tanan nga quiz bee kag gintigayunan kang iskolarsyip para sa banwa gid maka-hayskul.

Isara si Ma’am sa nakilala ko nga pinakasagad magtudlo. Isara sa pinaka-gwapa. Urihi kami nagkitaay ka isarang tuig. District Supervisor run tana kag manug-retire. Gin-imbitar na ako nga maghambal sa Christmas Party nanda kag nangin partner man kang kahiwatan kang Balay Sugidanun ang bilog nga distrito. Bahul gid akun pagpasalamat ilabi na bangud sa husto man gid nga takna. Ginalauman ko nga makitaay ruman kami ni Ma’am kadyang Disyembre pag-uli ko.

Duro gid nga salamat sa mga maestra kag maestro kang Barasanan. Pira lang dya sa akun nadumduman. Duro pa ang rapuyot nga mga istorya kag handumanan nga nangin mapuslanon sa akun formation bilang sangka tawo. Sa sunod nga semana, tinguhaun ko ipaambit man ang akun mga handumanan sa mga nangin manunudlo ko sa Dao Catholic High School (DCHS).