“Si Tiyang Fely, Ang Akun Amiga:” Panaysayun ni Elma “Nenen” Ayson-Mckeown

Si Tiyang Fely, Ang Akun Amiga
Elma Ayson-McKeown

Tuig 2011
90 run ka tuig ang edad na kang nagligad nga tuig bulan ka Nobyembre sang petsa 21. Ang urihi na nga sulat kanakun ay kang Paskwa 2010. Nasulat na mal-am run sa edad na kag nagapasalamat sa Ginoo nga ginpakamaayo tana sa gihapon mayad ang isipan, makilala na ang tanan kag madumdoman na ang mga importante nga bagay harandumon mayad kag ang hindi. Ilabi na gid sa akun pag aksidente hindi na malipatan gid. Labaw pa na makakita pa kag makabati ka mayad, magamit na pa anang mga alima kag mabaskog pa ang darwa ka kahig nga makatindog kag makapanaw panaw. Nagapasalamat man gihapon na maantos na kon kaisa ang chronic pain, mga sakit sa lawas na kag makayuhom pa man gid bisan sa Tylenol lang nga bulong makabulig sa sakit na temporaryo lang madura ang sakit. Ang kabaskog na kauna hindi na paris sa kaja nga inadlaw. Ginkun-an na ako nga pasensiyahun lang sa malawid na sulat nga daw nobela kag may habol pa nga Ha Ha Ha! Nakayuhum man gid ako.

Ginsugid na pa nga ang ana nga nanay napatay sa edad nga 86 sa aksidente hay gin hapit ka sarakyan habang nagapanaw laktud sa dalan halin sa tiendahan nga nagpanindahan. Sa sulat na may ginsulat gid nga binalaybay padara kanakun para akun mabasa kag ipaambit man sa akun mga amiga kag amigo. Mahilig tana magsulat poems kag puro parte sa pamilya kag kang tana pa ay bata, daraga kag kang nagaeskuela pa imaw ka anang mga kabugtoan.

Ginsulat na pa nga tana ang kagurangnan nga bata sa apat sanda. Tana na lang ang nabilin nga buhi pa. May ana nga pamilya pero nagasakit pa ang buot na sa tagipusoon mabatyagan na pirme para sa ana nga mga ginikanan nga wara makita kag mabatyagan ang gugma ka ana mga kabataan nga mayad kag mabinuligon ang lolo kag lola nanda. Ang tatay ni Tiyang Fely ay taga Iloilo ang apelyido ay Flores. Kuon na ang tatay na ay mapinalanggaun kag maatipanun. Kada Pasko gina isip na imagine ang nanay na masaku sa pagpreparar kay ang mga kaparyentihan kapamilya magtipontipon. Kuon na nga mayad ang anang pagkabata kag ang nabahulan na kag hindi na gid malipatan ang nagligad.

Kang Tuig 1977-1980

Sa ciudad kang Angeles, Pampanga kang tuig 1977 kang ako nag tawas sa akun darwa ka tiya Rosie kag Lourdes Mondejar Puedan nga naghalin pa sa Patnongon, Antique. Sakay sa barko halin Iloilo pa Maynila. Nag umpisa ako eskuela sa Universidad ka Angeles duro na ka beses kami nag saylo saylo sa ginarentahan nga balay. Mayad man duro nakilala kag mga amiga ka akun mga tiya nga akun man nakilala. Hasta na lang sa urihi nakakita ka balay nga marentahan marapit gawa panawon sa eskuelahan. Pero darwa pa ka beses sakay sa jeepney paagtu sa simbahan kang Clark Baptist kag sa Clark Air Base. Kay sadtu ang darwa ko ka tiya naga obra sanda sa sulod ka Clark Air Base.

Masadya man ako nga imaw ko ang darwa ko ka tiya pero sabado kag domingo lang ang pag imaway namun sa sulod balay dalayunan. Sadyahan ako kon magpanindahan kada Sabado imaw nanda kag mag simba kon Domingo.

Nakilala ko si Tiyang Fely Roncal Damasig kag kapamilya na sa Kalye San Pablo. Ang balay dalayunan ko sa pihak lang ka balay na. Ang una ko gid pagkita kay tiyang Fely ay nagapanglaba tana sa gripo sa kilid atubang kang balay dalayunan ko na ang tag iya ay si Flor Yu. Irimaw sanda kara gid pirme kon oras nga gapanglaba.Kapampangan ang ginahambal nanda. Siyempre masinadyahon man gid sanda nga nagpakilala kanakun.

Kilala run gali sanda ka akun darwa ka tiya. Mayad na lang kay maaram mag ilonggo si tiyang Fely. Sugid na nga taga Iloilo ang tatay ang apelyido ay Flores. Si Tiyang Fely isara ka retired teacher na 58 edad na run katu kang nakilala ko. Nagbahul tana sa Nueva Ecija kag nakapamana kay tiyong Pedro Damasig na taga Angeles City. Nakilala ko ang apat na ka mga bata nga katu puro run man may mga pamilya. Ang isara sa America sa Hayward, California nga kaja amo ra ang ginaimaw na hasta kaja sa edad nga 90 anyos . Imaw na sa palibot run ang mga kabataan kag kaapohan na sa amo nga lugar sa California.

Sa adlaw adlaw nga pag istoryahanany sa amo nga lugar sa kalye San Pablo pareho adlaw adlaw ang ginaobra na amo ang pag-atipan ka balay kag mga ralabhan na. Kon kaisa gani ginabuligan ko tana sa paglaba kon wara ako ti ginaobra basta lang gusto ko maimaw kag maistorya sanda. Sugid na gani nga ang tatay kag nanay na mapinalanggaon kag mabuot nga tawo. Kasubo na lang nga ang ana mga kabataan wara gid nakilala ang anda lolo kag lola hay sa marayu man sanda gaestar kag wara man gid kabisita siguro. Pero halin katu kapag naga istorya tana makita ko ang kasubo sa pungyahun na kag mabatyagan ko sa akun tagipusoon nga mabudlay man gid ang marayu sa mga ginikanan. Akun man gid naexperensiyahan ang amo nga sitwasyon ang marayu sa tanan nga kapamilya.

Paagi lamang sa sulat kag pagtawag sa telepono amo ang amun nga pagpadayon komunikasyon nga darwa. Padayon ang amun pagbalitaanay kon paano na ang amun sitwasyon. Salamat nga si Tiyang Fely na born again kag masadya padayon pag alagad sa Ginoo imawka ana nga mga palangga sa kabuhi.

Salamat sa Mahal nga Dios ang gugma sa kapareho bisan hindi kapamilya makita ang Iya gugma kag kamayad sa tagsa tagsa ka tinuga. Ang pagbinuligay, pagpalanggaanay nga may pagsalig kag pagtoo sa Iya nga makagagahum, maloloy-on kag mapinalanggaun nga Amay sa Langit para sa atun tanan tanan. Dalayawon ang Iya Mahal nga Ngalan!

Amo dya ang binalaybay nga ginsulat kag ginpadara ni Tiyang Fely kanakun kang pasko 2010 nga ana gid gin hand written . Ang amiga ko ay 90 run ka tuig ang edad, may 16 ka apo kag 16 man ka apo sa tuhod:

I Wish I Were

I wish i were a baby again
To feel the warmth of my mother’s breast while feeding me
To hear her voice while she sings to make me sleep
To see her smile while she cuddles me tenderly.

I wish i were a baby again
To feel her hands leading me carefully while i tried my first step
She makes sure that i would not fall
A fall that might surely hurt myself.

I wish i were a baby again
To hear my mother pray that God save me from harm
To see the glow on her face when someone says how cute i am
And feel her hugs and kisses so warm.

I miss her so much the tender love and care of my dearest mother
Beautiful memories of her will linger in my heart and mind forever
I wish every child would know how he/she was cared for
And that an aging mother always reminisce those days of yore.

by: Fely Roncal Damasig

________________
Litrato ni Tiyang Fely halin sa tagsulat.