SA LIKOD KANG AKUN SILIK NGA LIMUG
(Binalaybay para sa International Working Women’s Month)
Sa pagbag-o kang dyang kalibutan
Nagpinsar ako nga papag-unun ang akun kinaadman
Nagsulud ako sa patag-awayan kang kabuhi
Ginpasyagit kag kang nabatian nanda ang akun silik nga limug
Ako anda ginkadlawan
Sakit sa baratyagun nga limitado ang akun mahimo
Ginhan-us nanda ako sa dum-ok kang bayuan, sa kusina nga maraing
Hay ginapinsar nanda nga amo lang dya ang akun masarangan
Pareho kang pispis nga dalawidaw
Ginapabay-an
Hay abi nanda limug lang
ang anang pambato sa tanan
Rayu sa banog nga baskug ang paku sa paglupad kag pagdara kang pisu nga maluya
Sa likod kang akun silik nga limug
May kinaadman ako
Kusug nga ginapirit ipaintyindi sa mga tawo
May ikasarang ako
Bukun lang amo dya ang mahimo ko
Makuri man ang akun mga kahig sa pagtikang
Kulang man ang purus kang akun mga butkun
Hindi kamo magkabalaka
Kun ako ang makadasma
Mabangon ako kag turuka
Hindi ako maalang-alang sa pagtindug
Sarangan ko atubangun ang adlaw nga may yuhum sa akun baba.
Pagbag-o.
Singgit kang
akun dughan
Babaye ako.
Itupung ang inyong panuruk,
hindi pagpanabaa
Untati ang pagtingala nga makita sa inyong mga mata
Huod, sarangan ko dya
hindi run pagpamangkot
Sarigi ako.
Tugrui ako kang tyempo
Nga mapamatud-an ang akun kaugalingun
Makatupung ako sa inyo ginatindugan
Ang akun silik nga limug may maabutan
Hindi man madara kang akun butkun ang kabug-at kang
inyong ginapas-an
Hindi man ako makakuntis sa pagdalagan
May purus ako nga magpabag-o kang paraabuton
Patas kang pispis nga dalawidaw
Ang akun silik nga limug
taas ang madangtan.
Balay Sugidanun 