Ang mga Bulak kag Insekto

Gusto ko ang mga narisari nga bulak pero ang paborito ko gid amo ang Pansy. Makita ko ang itsura ilabi na gid iba sa iba man nga kolor kang bulak. Makayuhom man gid ako sa pagturuk sa bulak nga dya kay may itsura nga nagaturuk man balik kanakun. Kon kaisa gani makakadlaw ako kon makita ko ang akun ginabatyag sa itsura ka bulak. Ang Daisy, Sweet Coneflower, Iris, Johnny Jump Up kag iban pa gatubu lang man gid dya sa taramnanan kag kakahuyan amo nga bisan wild pa nga mga bulak ginakali ko rian kag isaylo itanum. Ang resulta indi run wild tungud akun dya ginaatipan. Katahum lantawun nga makatugro ka yuhom kanakun ang mga bulak sa bilog nga apat ka season Spring, Summer, Autumn kag Winter.

Kahapon lang gid, sirum run pero ang adlaw gasirak pa kay man malawid kon Summer. Nagbisita anay ako sa akun kaingud kay si Mama Hamel nag-abot halin sa Florida. Nagbisita rugya sa bata na nga si Lori H. Blier kag pamilya. Sa akun pagpanaw sa binit karsada, nakita ko ang matahum nga bulak nga orange ang kolor. Nami nga bulak pero magamay kag nagaisarahanun lang sa tunga ka mga hilamon. Ay, ti, akun man dya ginbunot kag gindara pakita ko kay Mama. Black eyed Susan ang bulak pero iba ang sahi na. May yuhom ako nga nagkuon nga “Mama, itanum ko dya nga bulak sa pag-uli balik sa balay.” Huod, pag-uli ko man gid sa balay diretso ako sa garden kag gintanom ko.

Duro pa ang maobra ko sa pagtatap ka mga tanum nga laswa sa hardin kag sa amo nga inoras indi gid mainit pero duro man ang mga lamok, bees, horse flies kag black flies kag dya nga sapat indi ko gid gusto nga makagat kanakun. Nagadalagan ako palagyo pasulod sa balay kon mabatian ko ang hagung ka lamok ukon ang paglupad-lupad palibot kanakun kang insekto. Bisan ano pa rian akun ginakaptan mabuy-an mahulog ko, bayaan ko na lang kag magdalagan palagyo pasulod sa balay. Tungud gani nga akun run naeksperyensiyahan ang makagat ka mga insekto, nagabanug man gid ang nakadtan nga panit kag magkatul. Allergic man gid ako sa kagat bisan may bulong pa nga ipatapna sa katul. Ang banug kag ang kolor nga purple ang inagyan ka kagat kag katul buhay madura. Maabutan ka binulan dyan gihapon ang marka nagapabilin. Amo rian ako kadya ginakadlawan lang nanda ako rugya. Kon kaimaw nanda kon kaisa gasiyagit run ako ilabi na gid kon makita ko ang ticks sa panit ko nga gakabit kagat. Ano pa mahambal na lang tilawit kuno ako sa mga insekto. Depende kon ano nga klase kang insekto.

Hasta sa sunod nga Biyernes. Bantayi ninyo ang akun duro pa nga istorya parte sa bulak.