Litrato ni Carlo Tamba
Una ko tana nabatian bilang si Ma’am Bandiola, nga rugto sa banwa kang Hamtic may ginahanas nga kabataan sa pagtukar kang rondalya. Nagkamustahanay kami sa text. Nagsugtanay nga matukar sanda sa pagsaulog kang una nga Padya Kinaray-a katong hapon kang Disyembre 26, 2011 sa Casa Madrangca sa San Jose de Buenavista (Sa litrato, si Ma’am Bandiola ang sa likod nga nagatukar dungan sa anang mga estudyante).
Si Ma’am Bandiola wara’t liwan kundi si Ma. Magdalena Bandiola, sangka daraga. Istorya na, una tana na-expose sa pagtukar kang rondalya katong kolehiyo tana kag nagaistar sa Asilo de Molo sa Iloilo. Hay rugto, may nagabisita halin sa Bacolod para magtudlo kang musika. Kag nakamaan tana paagi sa pagpanilag.
Kang nangin manunudlo tana, sa isara sa pinakabukid nga eskwelahan kang Hamtic tana nadestino, sa Pili Elementary School. Te hay bukid, wara tana magsagi ka guwa, ilabi na bangod daraga – duro sunoy – gani sa balay lang tana nga ginaistaran nagsagi tener. Rugto nadumduman na magtiraw tukar kang rondalya para lingawon ang kaugalingon. Nagbakal tana kag nag-umpisa kuting-kuting. Gindumdom na ang napanilagan na, ang nadawi na nga kaaram halin sa Asilo de Molo.
Gintudlo na dya sa anang mga estudyante. Sa kada eskwelahan nga tana nadestino.
Sa kadya, halos apat run ka tuig nagatukar ang grupo kang mga estudyante halin sa Hamtic Central School. Ang andang ginagamit nga mga instrumento naghalin pa sa ginsolicit na nga bulig sa sangka politiko. Sa simbahan sanda pirme gatukar, by request – libre; luwas lamang kon may ga-hire kananda.
Pero regular ang pagtuon kang mga bata. Kun Sabado kag kun kaisa asta Domingo. Kun may tukaran sanda, gatakna sanda kang tyempo para mag-practice.
Nagahandum si Ma’am Bandiola nga daad, maabay man ang pagtukar kang rondalya sa mga kultural nga paraguwaan kag paindis-indis para duro pa nga kabataan ang magka-interes magtuon. Kag padayon ang musika kang rondalya magdagyaw sa pagtukar kang handum kang kauswagan, kalinung, kag katarungan.
Litrato ni Pearl Joy Asenjo: “Ang Hamtic Rondalla sa Padya Kinaray-a”
*Salamat kay Ms. Ceci Pefianco sa pagbulig pakig-angot sa Hamtic Rondalla.
Balay Sugidanun 