Skip to content

Posts tagged ‘Byahe sa Kinabuhi’

19
Nov

‘Amsterdam kag The Hague’

Follow Balay Sugidanun on WordPress.com

Madurodam, gamay nga Netherlands

Madurodam, gamay nga Netherlands


Jigsz NS/Byahe sa Kinabuhi

Jigsz NS/Byahe sa Kinabuhi

Ang amun byahe halin Geneva paagto sa Amsterdam, The Netherlands matawhay lang. Nag-tren kami halin sa syudad kang Geneva paagto sa anda nga airport. Kadasig lang man. Ang anda international airport nagatindug sa lupa kang Switzerland kag France. Nagpila kami para magcheck-in. Labug-labug ang pila tungud duro ang nagabakasyon sa bulan kang Hulyo. Sa Europa, halin Hunyo asta Agosto ang mga bulan nga nagabakasyon ang kalabanan kang mga tawo. Manami ang tyempo kag daw kasadya lang. Gabii run kami nag-abot sa Amsterdam Schipol Airport. Dayon kami agto estasyunan kang tren para magbakal kang amun tiket paagto sa The Hague. Hulas lang man ang anda patakaran sa pagsakay sa tren halin sa airport tungud may estasyunan sa idalum lang kang airport mismo. Naka-abot kami sa The Hague kag ginpangita namun ang amun hotel. Manami kag comportable. Nakapahuway kami kang mayad. Naga-uran-uran man gawa.

Pagka-aga nagpamahaw kami kag manamit man ang anda pagkaun. May sangka Pinoy man nga naga-obra rugto kag nagpakilala man tana kanamun kag nakipag—istorya. Ginlibot namun ang syudad paagi sa pagpanaw-panaw kag pagsakay sa tram. Nag-agto kami sa Madurodam kung sa diin makita ang mga lugar kag mga bilding kang Netherlands nga magagmay. Nami man maglibot-libot rugto. Pagkatapos nagsakay kami kang tram paagto sa baybay, sa Schevenigen. Rugto kami nag-igma sa sangka restoran sa binit kang baybay. Buhay lang ang amun hulat. Gani nasaraduhan kami sa sunod namun nga dapat agtunan, ang Delft blue factory. Nagbalik run lang kami sa The Hague liwat.

Pagkasunod nga aga nag-libot kami sa syudad kang Amsterdam. Ang una namun ginhimo amo ang magsakay sa baroto kag maglibot sa mga kanal kang syudad. Duro ang mga kanal palibot sa syudad kag duro man nga mga istorya parte sa mga balay, bilding, tulay kag karsada nga naga-angut sa mga kanal. Lain man nga perspektibo ang imo makita kung naga-turuk ikaw halin sa kanal, samtang nagapamati sa gina-istorya kang tour guide. May mga karadlawan kag may mga masubu. Daw katawhay lang kung nagapungko ikaw sa baroto kag magturuk sa babaw sa mga karsada nga duro-duro tawo nga naga-dali magpanaw sa anda nga orobrahun.

Ang baroto nga ginsakyan

Ang baroto nga ginsakyan


Pagkatapos kang libot namun sa kanal, nagbyahe kami paagto sa sangka lugar nga naga-himo kang smoked eel. Nagpangape man kami rugto kag nagtiraw man kang smoked eel. May kanal man sa lugar nga dya, tungud kaduro lang kang kanal sa Netherlands, ilabi nag id sa Amsterdam, tungud sa anda nga lugar nga dapat kontrolon ang saka-panaug kang tubig agud hindi magbaha parehas kang nagligad nga mga tinuig.

Ang sunod namun nga gin-agtunan amo ang may windmill kag ang mga ginahimuan kang keso kag sapatos nga kahoy. Manami man tungud makita ang katandus kang mga tawo kang una. Hasta kadya may mga windmill nga ginausar, ugaring ang iban moderno run ang disenyo. Interesado man kami maglantaw kang paghimo kang keso. Manami pa tungud puede magtiraw-tiraw kang lain-lain nga klase kang keso. Ang sapatos nga kahoy sangka simbolo kang Netherlands. Ginagamit dya kang mga mangunguma kag mga iban nga obrador agud maproteksyonan ang anda mga kahig kung naga obra sanda sa uma ukon sa planta. Gamay run lang ang naga-gamit kadya, ugaring milyones pa gihapon ang anda ginahimo tungud sa mga turista nga nagabakal kadya bilang souvenir.

Pagbalik namun sa hotel, nagpahuway kami kag nag-umpisa run empake tungud magpa-uli na kami. Masadya man ang amun paglibot sa mga syudad sa Europa. Nakita namun ang lain-lain nga pagsinarayo kang mga tawo. Masadya maglagaw kung may mga imaw. Gani pag-bulaganay run namun sa airport, daw nasubuan man kami, tungud mabuhayan ruman siguro asta magkitaay kami liwat kanga kun bugto kag mga amiga.

Advertisements
24
Sep

Geneva, Syudad kang Tsokolate kag Relo

geneva1

Jigsz NS/Byahe sa Kinabuhi

Jigsz NS/Byahe sa Kinabuhi

Kang nagapangita ako sa internet kung diin kami mag-tener sa Geneva, nanotaran ko nga tama gid kamahal ang mga hotel. Tuud man nga wara ti kaso kuno bisan magkinawboy kami kang mga imaw ko basta lang maka-kinut sa baraydan, ugaring dapat pinsarun man namun nga ang amun turugan bukut ti delikado. Tungud estranghero kami sa sangka lugar, dapat mag-andam man kami. Duro run ang akun nabatian nga mga istorya parte sa mga turista nga naga-istar sa mga gagmay kag barato nga mga iristaran, ugaring sa urihi maghinulsul tungud gintakawan. Gani nga ang una gid nga turukun amo ang mayad gawa nga hotel, basi bay may dyan nga masarangan kang budget. Ugaring sa Geneva daw wara gid. Puro mahal. May kilala man ako rugto nga sangka pamilya nga Indian. Nag-kuun man nga puede kami rugto ka turog kananda hay may lugar man kuno, tutal maturog lang man. Ugaring daw namayha man ako hay apat kami, kag basi ma-istorbo man sanda. Kag hindi man nanda kilala ang tatlo ko ka imaw.

Mayad run lang nakakita ako kang medyo barato gawa komparar sa iban. Ang Geneva City Hostel. Daw para sa mga backpackers, mga estudyante, mga bataun. Simple lang man ang mga kuarto ugaring tama ka gamay. Kung bahul ang imo maleta, magutok sa kuarto. Turugan lang gid. Kag wara ti banyo kag kasilyas sa sulud kang kuarto kungdi ma-gwa kaw pa sa kuarto mo, kag ang iban nga kuarto makagamit man. Gani nga paunahay sa banyo kag kasilyas, nga parehas sa dormitoryo sa kolehiyo.

Manami man ang mga staff kang hostel. Mabinuligon. Tungud siguro nga daw ka impormal lang rugto kompara sa mga bahul nga hotel. Daw mas maalwan ang mga bataun pa sangsa sa daw may edad run. Namigo namun ang sangka Italyano nga estudyante nga naga-obra man rugto, ngaran na Davide. Duro ang bulig na man kanamun. Siguro daw mga magurang lang ang turuk na kanamun. Duro ang amun mga pamangkot kag duro man ang ana pasensya sa pagsabat. Nagbulig pa gani tana sa akun nga labada. Daw ako lang ang namayha.

Pagka-check-in namun, gintugruan man kami kang card nga para sa mga tren, bus kag tram sa syudad kang Geneva. Libre ang sarakyan publiko sa mga turista. Kada sara kanamun may dyan nga card ukon city pass. Gani wara run kami nag-gasto pa bakal kang tiket maglibot-libot sa syudad. Pagusto lang kami saka-panaog sa mga tram kag bus. Kag sa tren pa-agto sa airport. Basta hindi mo lang pagduraun. Kung madura gani imo city pass, wara kaw run ti gamiton kungdi magbakal gid kaw kang tiket. Ang sangka imaw namun nadura man ang ana pass. Gin-mangkot na ang staff kung puede matugruan liwat. Nalooy man siguro kag gintugruan tana liwat.

May nagkuun nga tanan mahal sa Geneva luwas lamang sa tsokolate kag relo. Gani sa amun pinsar, kung mamakal gid man kami, amo lang ra amun baklun. Bilang pasalubong. May parte kang syudad kung sa diin ang tanan nga mga bantog nga ngaran kang mga relo may anda nga opisina kag gamay nga workshop.

Duro ang mga lain-lain nga lahi rugto tungod duro nga mga internasyonal nga organisasyon rugto naga opisina. Ilabi na gid ang United Nations. French ang pinaka-lengwahe nanda rugto. Duro man ang nasugata namun nga mga Pinoy, may mga propesyonal, may mga sosyal, kag may mga simple lang. May mga bugalon, mga hambog, kag sa pihak nga bahin, may mga binuligon man. May mga manol man gani, abay run kami dyan karia. Sadya lang mag-panaw-panaw sa syudad nga dya. Nag-agto kami rugto sa lugar kang UN kag nagpa-piktyur sa water fountains nga parehas makita sa Market Market sa atun, ukon sa Promenade sa Bangkok, kag sa iban pa nga mga lugar siguro. Rugto man makita ang nagahilera nga mga bandila, kag ang higante nga purungkuan (Broken Chair) nga monumento kang mga naduraan kang kabuhi kag parte kang lawas tungod sa land mines. Nagpanaw kami gamay kag may nakita kami nga museum. Libre lang kungdi nagsulud kami kag naglibot-libot man rugto. Manami ang mga ginapakita nga mga butang, ugaring gamay lang ang maintindihan ko nga mga nakasulat hay French ang gamit nanda. Pero kanami lang turukun hay makita mo man ang istorya kang ginapakita bisan sa arte kag drawing lang.
geneva2
Pagkatapos sa museum nag-panaw liwat kami paagto sa Jardines Botanique. Rapit lang man. Bahul bahul nga lugar. Rugto makita ang mga lain-lain nga mga tanum nga makita sa bilog nga kalibutan. May mga tema sa kada parte kang hardin. Ang nanami-an ko gid ang mga bangko kung sa diin puede ikaw ka pungko kag magbasa-basa, ukon magkaun kang imo balun, ukon mag-pahuway. Manami kung ang bangko sa idalum kang bahul nga kahoy agud matabunan ang sirak kang adlaw kag hindi masilaw. Ang mga puti nanami-an magpungko sa tunga nga magpa-init tungud talagsa lang man sanda makakita kang sirak kang adlaw.

Halin sa hardin nagsakay kami kang bus pabalik sa syudad kag nagpanaog kami rapit sa Lake Geneva ukon Lake Leman. Bahul katama kag may parte kang lake nga rugto sa France. Manami ang mga ralantawun rugto kag nagpanaw-panaw liwat kami, kag nagkodakay. May bahul nga Water Sprout sa tunga kag duro ang naga-pa-kodak man rugto. Duro man ang mga tawo nga nagapanaw-panaw, daw parehas lang man rugto sa atun sa atubang kang MOA, ugaring daw ligwa kag daw tawhay gawa sa Geneva. Kag limpyo. Nami ang sirak kang adlaw gani nga daw kasadya lang sa palibot. May mga gagmay nga mga baroto nga puede ma-rentahan kung gusto nimo nga magboating sa lake.

Kang natak-an run kami, nag-panaw kami kag maghulat kang bus liwat agud maglibot sa iban pa nga parte kang syudad. Samtang nagahulat kami sa bus stop, may iban man nga mga tawo nga nagahulat. May sangka bayi nga nag-abot. Pagkatapos may nagsunod ka na nga sangka bayi nga daw gina-away na. Nahadlok kami basi kung ano ang matabo. Nagasinggitan ang ikarwa nga bayi nga daw lingin. Ugaring wara lang ginasapak kang una nga bayi. Wara kami kamaan kung kilalahay sanda ukon hindi. Gadali kami nga mag-abot run ang bus. Nagpanaw ang ikarwa nga bayi ugaring sige pa ang balikid na, nga daw mabalik pa. Pag-abot kang bus daw nakaginhawa man kami kang hilway.
geneva3
Daw joy ride ang ginhimo namun. Nagpanaog kami sa bus pag-abot sa pihak kang lake kag rugto nagpanaw-panaw man kami. Asta nga nakalambot kami sa lugar nga may Flower Clock. Bulos-bulos man ang mga turista sa pagposing. May sangka mag-asawa nga mal-am run kag nagpa-piktyur sa atubang kang flower clock. Naga-holding hands nga daw magnobyo lang. Kanami kananda lantawun. Daw ka-irima lang, kag ginsunlog ko ang mga imaw ko nga mga daraga pa nga sa sunod da nga agto rugya dapat may imaw run sanda nga parehas kang mga mal-am nga dya.

Nagutom kami kungdi nagbalik liwat kami rugto sa tunga, sa estasyunan kang tren nayun. Nangita kang irigma-un namun. Nagpizza kami. Pagkatapos naglagaw-lagaw kag nagshopping. Kang tsokolate kag relo. Pagkahapon nagbalik run kami sa hostel tungod mayapon kami rugto sa balay kang akun mga kakilala nga mga Indian. Gin-abat kami kang bana kag antes mag-agto sa anda nga balay, ginlibot na anay kami sa sagwa kang syudad. Rugto nakita namun ang lokal nga mga pagsinarayu kag ang mga panimalay. Pagkatapos nagsulud kami sa parte kang France, ang banwa kang Voltaire. Manami man nga lugar. Duro ang naga-istar sa lugar nga dya kang France kag naga-obra sa Geneva. Tungod mas barato. Kalabanan man kananda rugto pa ga agto sa Paris agud magshopping tungod mas barato rugto. Masadya man ang amon paniyapon rugto kananda. Indian food ang putahe kag manamit man. Busog-busog gid kami kag nasadyahan gid kami nga nagkitaay kami liwat pagkatapos kang mga darwa ka tuig. Ang anda mga bata mga tin-edyer run, kang una ako ang mas taas kananda, ugaring kadya mas taas pa sanda kanakun.

Gamay lang nga syudad ang Geneva. Masadya ang amun pagbisita rugto. Pagkasunod nga adlaw, nagpreparar run kami magbyahe paagto sa Amsterdam. Kabay nga wara pa kamo nakapoy sa pagsunod sa amun nga byahe.