Skip to content

August 27, 2013

Vienna, pinakamanami kuno nga syudad?

by Pangga Gen

viena

Jigsz NS/Byahe sa Kinabuhi

Jigsz NS/Byahe sa Kinabuhi

Naglupad kami halin sa London Gatwick airport paagto sa Vienna, Austria. Mga tatlo lang man ka oras ang flayt. Tyempo kang bakasyon rugya gani nga duro ang naga-byahe, halin sa bata asta sa mal-am. Kanami turukun ang mga pamilya, nga ang anda mga bata nga bahul run gawa mansig bitbit kang anda nga bag. Ang mga mal-am nga mag-asawa manami man lantawon nga nagadapitay magpanaw. May mga tin-edyer man nga grupo nga naga-byahe. May mga puro bayi lang kag may dyan man nga puro laki. Sadya sanda lantawon tungud makita mo nga naga-paporma sanda sa kada sara. Daw madumduman man namun kang mga tin-edyer kami, kag may mga baguhan sa banwa ukon sa ingud balay nga naga-bakasyon. Rugyan ang pagka-mausisa kung sin-o kag ano ang anda hitsura.

Gabii run pag-abot namun sa Vienna. Ikarwa ko run dya nga agto sa Vienna airport. Ang una katong 2002. Kadya 2013. Bahul nga pagbag-o. Moderno run lantawun ang anda airport. Limpio. Kag hulas lang maghulag. Pag-gwa run namun ginpangita namun ang tourist counter para mag-pamangkot kang direksyon. Mabuut man ang staff nga bayi. Ginbuligan na kami magbakal kang tiket kang tren sa makina. Kag gin-tugruan na man kami kang mapa. Nagpanaog kami sa basement para maghulat kang tren. Nami e hay may tren mismo sa airport. Trese minutos lang paagto sa syudad kang Vienna. May darwa ka bayi nga nagdungan man kanamun nga naghulat kang tren. Ang sara medyo mal-am run pero daw lingin. Wakalan. Nag-istorya man tana kanamun. Kuun na nanami-an kuno tana kang mga Pilipino. Daw fans sanda ni Paul McCartney nga may concert sa Vienna sa semana nga to.

Pag-abot kang tren, na-impress gid kami. Bahul-bahul, kag ligwa sa sulud. May lugar gid para sa bagahe. Komportable man ang amun pagpungko. Pag-abot sa syudad, nag-saylo kami sa sara pa gid nga tren para sa amun hotel. Hindi namun kabisado kung diin mag-agto gani nga alisto ako magbasa kung ano ang mga nakasulat sa dingding. Nakasakay kami sa sara pa gid nga tren. Ginkun-an ko ang mga imaw ko kang amun agtunan para hindi lang ako ang magpaminsar kag mag-alisto. Buligay lang kami. Sa urihi naka-abot kami sa amun parana-ugan nga istasyon. Nag-panaog kami sa tren kag nag-agto sa exit. Ugaring hindi namun makita kung sa diin. Nagsaka kami sa babaw para magpamangkot sa staff. Gabii run pero mayad hay may tawo pa sa opisina. Asta nga naka-gwa gid man kami sa eksakto nga exit.

Pagka-gwa namun sa estasyon, imbes nga sangka liko lang sa wala gale halin sa puertahan, deretso kag magliko tuo sa una nga likuan, nagsobra ang amun tikang. Hay pagka-gwa sa exit, nagliko kami sa wala, kag nagliko pa gid sa wala kag nagderetso panaw, kag nagliko sat tuo tabok sa tulay. Kungdi nagtalang kami. Parayu na kami sa hotel namun. Nagpamangkot kami kang direksyon ugaring mga tawo rugto daw hindi mabinuligon. Duro amun paagto-pabalik. Gabii run katama. Guyud pa namun ang amun bagahe. Pero daw wara man ako nakapoy hay tungod siguro sa kakulba kag dapat sigihun ko gid pangita kung sa diin ang hotel. Asta nga nagdisisyon kami nga magpamangkot sa sangka hotel nga kita namun kag nagpabulig kami patawag kang taxi.

Pag-abot namun sa hotel, daw naka-ginhawa man kami kang madalum. Rayu run gale tana ang amun ginpanawan. Mayad lang nga komportable man ang amun hotel kag mabuot man ang receptionist. Nakapahuway man kami kamayad kag manami man ang amun turog. Sangka gabii lang man kami sa hotel nga dya hay gindugang lang dya namun sa amun booking hay temprano kami nag-abot sa Vienna. Pagkasunod nga adlaw, nagcheck-out man kami hay masaylo rugto sa centro kung sa diin naka-book kami mga darwa ka gabii.

Antes kami maghalin, nag-pamahaw anay kami. Abay man dya sa amun bayad. Manami man ang anda pamahaw kag nabusog man kami.
Nagbalik kami sa estasyunan kang tren. Rapit lang man gali kag nakita namun kung diin kami nagsala kang gabii. Kadya daw eksperto run kami sa direksyon kang mga tren sa Vienna. Nagbalik kami sa syudad kang rugto gintultul liwat namun ang amon bag-o nga istaran. Nagpamangkot man kami kang direksyon. Wara run kami nadura hay natultulan man namun. Ugaring aga pa kungdi ginbilin liwat namun ang amun bagahe kag naglagaw run kami sa Vienna.

Sa liwat, nag city tour bus kami. Manami gid dya hay duro imo makita kag may naga-istorya pa. Kang naga-libot kami sa syudad, tuud gid man nga daw pinasahi ang syudad nga dya. Kilala ang Vienna bilang “Syudad kang Musika” kag “Syudad kang Damgo”. Puno kang mga istorya kang politika, musika, arte, syensya, relihiyon, kag iban pa. May chismis pa gani nga dara. Karadlawan man ang iban. Nagsaka-panaog man kami sa mga lugar nga gusto namun libuton pa. May mga museum, kastilyo, hardin, simbahan, plaza. Nagpanaw-panaw. Piktyur-piktyur. Nangape.

Sa amun paglibot-libot hindi mo gid maibitar nga hindi mag-agto sa kasilyas. Toilet sa kananda. CR kung sa mga pinoy. Ukon sa mga imaw ko nga halin sa Canada, washroom. Ugaring may bayad gid. Gani dapat may sinsilyo pirme. Rugto sa kasilyas rapit sa Opera House, ang tema kang anda dekorasyon daw Opera man. Kag may nagatukar nga mga orchestra samtang ga-usar kaw kang kasilyas. 1 euro ang bayad. Ugaring daw ka-isug kang babayi nga nagabantay. Sagi hambal kanamun nga daw nagapangara. Wara tamun ka intindi kung ano gina-wakal na. Wara namun ginsapak tutal wara man kami may ginhimo nga sala.

Sa amun paglagaw man sa syudad para magshopping, gusto man namun tirawan ang Vienna sausage. Sa atun sa Pilipinas ang man-an ta nga Vienna sausage ang delata lang. Pero rugto duro nga klase kag mga daragkul nga sausage. Ang sara pa kang anda nga pagkaun amo ang apple crumble nga cake.

Apple Crumble Cake

Apple Crumble Cake

Husto gid man ang kuun nanda nga ang Vienna, kanami. May miga ako nga nagkuun nga sa tanan nga gin-agtunan na sa Europe, amo kuno dya ang pinakanami nga lugar. Mapati man gid ako bisan wara pa ako kaagto sa bilog nga Europe. Manami tungud nakita mo ang mga bilding nga daragkul nga puno kang istorya. Ang parte kay Mozart, Teresa, kag iban pa. Mabatyagan mo ang kabahulun kang andang damgo nga mag panguna sa bilog nga Europe kag kalibutan. Ayhan mabatyagan mo man kung naga-tangra kaw sa mga bilding kag nagaturuk kaw sa dagat kang Danube. Sa kanami kang lugar ma-intindihan natun kung andut duro ang mga nagsulat kang musika ang na inspire rugto. Bisan halin sa iban nga lugar, nag-iristar sanda sa Vienna kag rugto sanda naka-komposo kang mga musika nga asta kadya bantog pa gihapon.

Kanami gid man kang syudad nga Vienna. Bantog man dya sa mga internasyonal nga mga komperensya. Duro nga mga turista ang naga-agto. Kabay lang nga i-kampanya kang gobyerno nanda nga mangin-maalwan ang mga tawo rugto. Kung kaisa ang anda ginawi daw hindi manami, ilabi na gid sa anda panghambal nga daw wara gid ti lambing kag wara ti pasensya magsabat ukon magbulig sa mga turista.

Ang manami man rugto amo ang anda transportasyon. Tungud naga-angut sa iban pa nga mga syudad sa Europe, duro ang mga paagi nga mag-agto sa mga lugar sa palibot. Luwas sa eroplano, puede man magsakay sa tren ukon bus paagto sa iban mga syudad nga dya. Gani kami nagtren kami paagto sa sunod namun nga agtunan.

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

Note: HTML is allowed. Your email address will never be published.

Subscribe to comments