Ana gin-alsa ang magamay nga alima
Sa pagkuris sa kanbas kang kahawaan
May kalum-uk mga tudlo sa pagtultol
Kang kada linya kang kasanag
Gindunganan yuhum
Dayon pintok kang mga bitoon
Gin-angut ang mga idlak
Sa mga tudlo nga mga igpat kang palad
Ginsukol kang anang dupa
Ang karayu kag kalawid
Kang hantad kang sirak kang langit
Sa akun mga mata nga kana nagapilit
Ginbutung ang sanag nga lawig
Bulan nadusdos sa gal-um, nayudyod parapit
Tutum sa pagpamati sa gamay nga bibig
Tinaga kang langit mga pulong nga ginsambit
Parehas kang pahabok, bulan ginbuy-an
Lutaw-balik, gin-anod sa lawud kang kahawaan
Ginpabalonan kang haruk, himpit nga pamaalam
Gindagit parayu ang andang kamatooran
Sa kahamyangun ginpadayon anang sugidanun
Ako run ang namati magsagi ka yuhum
Tubtub sa kahamuuk ako ana nahaylo
Nga sa anang ingud indi magparayu
Balay Sugidanun 