Mansanas
Ma. Milagros Geremia-Lachica
Sa istorya-pangbata nga ginpabantog pa gid ka Walt Disney sa sine,
ginkaun ni Snow White ang mansanas nga may hilu
kag nagturog tana it malawid hasta nag-abot ang sangka prinsipe
nga nagharuk kana kag nagsalbar sa darayun nga kahamuukun;
Sa bibliya, nagkaun man ka mansanas si Adan kag si Eba
bangud sa panulay nga sugyot ka man-ug; wara sanda malipung
ukon maturogan pareho kay Snow White, kundi ahat sanda nagbugtaw
kag nakamarasmas sa naambit nga kaaram halin sa mansanas,
ang bunga ka kahoy kang kabuhi nga gindumili kananda ka Ginuo
kag sanda gintabog ka anghel paguwa sa hardin kang Eden;
Pero ang man-ug nagtuhaw liwan: kapitalismo ang ngaran,
wara sa Eden kundi rugyan lang sa unhan, sa mga tindahan,
mall kag online nga mga baraligyaan;
kag ang bag-o nga mansanas: iPhone4s
nga ginpilahan ka mga Eba kag Adan nga may ikasarang
sa pagsunod sa hutik kag sugyot kang man-ug
nga padayon sa pag-alihid kag pagsuhot
sa madamul nga mga hilamon kang katawhan;
Dali bakal kamo, presyo lang ang nagadumili nga ginuo;
buhay run nga gintabog sa Eden si Adan kag si Eba,
gani hilway kamo sa pag-ingkib sa dya’ng mansanas
nga nagadara kang bag-o nga kaaram sa siglo beynte-uno.
Balay Sugidanun 