Ang Akun Amiga nga si Colleen Hamel

Maswerte gid ako nga bisan estranghero lamang ako rugya kag nagaisarahanun nga Pinoy sa komunidad ka Wales, Maine, may mga mayad kag mahigugmaun nga mga tawo sa akun palibot kag kaingud balay.

Ang akun amiga amo si Colleen Hamel. Bataun pa man hay napulo ka anyos ang akun agwat kana. Isara ka maestra sa publiko nga elementarya ka Leavitt, Turner, Maine. Kauna sa Lisbon naga-maestra bag-o nagsaylo rugya sa Wales. May biente cinco nga mga estudyante tana sa sulod kang kuatro grado. Depende man sa tuig kang pagbukas klase kon pira ka mga estudyante ang nagparehistro. Pira man ka beses ako nakaimaw kana sa pag-agto sa eskwelahan sa pagbulig decorar. Ang distansya ka balay paagto sa eskwelahan nga ginatudluan na sobra man isara ka oras ang dalagan ka kotse. Masinadyahun kag maalwan nga baye. Pero talagsa lang man kami rian nagakitaay kon indi weekends kag holidays. Masaku man gid pirme kag kon gabisita ako sa balay nanda sa eskwelahan man tana. Kon indi man gid importante ilabi na gid kon indi ako makatawag kana para kami magpanindahan ukon maglagaw ukon maglantaw ka sine imaw ka amun mga kabataan.

Tatlo ang ana mga bata. Puro man mga laki parehas ka akun. Dya sanday Brandon, Michael kag Jacob. Pero isara lang man gid ang ana nga matuod kadugo nga bata hay ang darwa nangin pangarwa nga nanay lang tana sa bata ka una nga asawa kang bana na kauna. Kaparehas man ka akun mga bata ang mga edad. Ang agut ko kag agut na mag- amigohay man gid. Iririmaw sa eskwelahan halin pa sa elementarya hasta high school. Ang nangin pangarwa na nga bana wara sanda ti bata kag napatay run, si Duane Hamel kang Oktubre 10, 2011. Tungud nga ang balay nanda kaingud ko lang, pero rayuay man, kon indi paghungdun magbisita sa sulod balay, sa taramnanan lang kami magkamustahanay. Singgitan mo ka “Hello,” balik kanimo “Hello” kag may echo pa! Kon kaisa gani sa taramnanan man kami magkitaay kag magkupkopanay kag may hambal nga “Palangga ko ikaw” kag magtindugan istoryahanay samtang ang mga bata nagasipal sa likod taramnanan!

Nakilala ko man gid ang kapamilya ni Colleen. Ang tatay na isara ka komposer ka kanta nga kon tawgon “country.” Tawag ko kana Papa Flynn. Tawag ko man sa nanay na Mama Flynn. Nagaobra tana part-time ukon seasonal sa LLBean. Mga isara man ka oras ang distansya dalagan ka kotse paagto sa balay nanda. Kon kaisa gaimaw ako man magbisita kananda basta kon mag-shopping kami gahapit sa balay ka mga ginikanan na. Kaisa kon holidays nga may ginapartisiparan ang mga bata kag sa balay nanda ginahiwat ilabi na gid ang trick or treats kon Halloween. Mayad nga mga tawo kag maalwanun; ginatugruan kami ka bag-o nga bayo kag halin pa sa LLBean nga nami nga kompanya kag marahalun man gid kon baklon ko pa. May bugto man si Colleen nga si Jeann nga may darwa man ka bata, sanday Izi kag Jesh. Gahapit man kami kon kaisa sa balay nanda kag makaistorya gamay kay hurungdun man gid kag ang tanan masaku sa pangabuhi. Kaisa kon may ginahiwat nga kaadlawan rugya man ang mga bata kaimaw namun sa balay ko. Ginapasalamatan ko sa Ginuo sanda nga tanan sa andang gugma kag maalwan nga tagipusuon. Indi ko malipatan ang mga yuhom kag ang magagmay nga bagay nga anda ginahimo sa pagbulig kanakun. Indi dya mabakal ka manggad: ang gugma sa kapareho nanda. Dayawon gid ang Dios.

Sa tinuig, halos sobra dose ka tuig gid man nga si Colleen ang kaimaw ko sa ano man nga hirimuon sa eskwelahan ka mga bata: mag-attend ka mga meeting sa school kag sa banwa, magsimba kag sa magpanindahan. Ginaplanohan gid kon san-o kami makatiempo magpanindahan, maglagaw, kag kon maglantaw ka sine sa sinehan imaw ka mga bata. Bisan magastos indi rian ginaisip basta lang nga masadyahan ang mga bata makalagaw kag makakaun kami sa restaurant kon kaisa sa China Buffet, AppleBees, TGIF, Steakhouse, McDonald’s, Kentucky Fried Chicken, Wendy’s, Red Lobster’s, Pizza Hut kag iba pa. Pero may bes man kon kaisa makatawag lang ako nga emergency gakinahanglan nga may agtunan importante handa man gid ang akun amiga sa pagdara kanakun. Luwas lamang sa akun pagpadoktor hay may sarakyan nga nagadara man gid kanakun, ang ahensya ka gobyerno para sa mga may may disability parehas ko.

Kon may mga okasyon parehas ka birthday ka mga bata sa balay man ginahiwat kag ang akun amiga kaimaw man gid namun. Kon kaisa ang akun amiga may dara man nga amiga kapareho na nga maestra kag akun run man nakilala. Masadya man gid ako sa pag-abiabi ka bag-o nga makilala kag nangin amiga ko man. Nahidlawan ko man tana. Sa urihi nagsaylo man gid ka puloy-an ang akun amiga kang nagbulagay sanda ka ana nga bana; mga darwa lamang ka tuig nga wara sanda gatingbanay pero sa gihapon si Colleen nagabulig sa bana na hasta na lang nasapwan sa balay ka amiga ka bana na ang napatay nga bana. Masubo man pero anhun mo bay indi run maibalik ang nagligad. Nagrayuay man kami pero sa gihapon parehas man nga kaingud ko man hay kaimaw ko man tana kada semana kag makita ko man si Colleen. Amo lang ra garing magastos sa gasolina kon pirme mag-imaway hay rayu run man gid ang ginsaylohan nanda. Pira ka beses katu ginadara na man ako sa bag-o na nga balay. Gabulig ako panglimpyo kag rugtu na lang kami nagakaun ka pizza nga gin-order na lang. Samtang gakaun galantaw kami ka horror movie nga amo ang paborito nanda. Ako man timo masinggitan na lang sa paglantaw kon may kaharadlukan man gid. Tapos kara kon gabii run ginadara man nanda kami pauli balik sa balay ko. Gapabilin si Jacob maghingga basta kon wara ti klase sa masunod nga adlaw. Bisan talagsa lamang gatawganay sa telepono makaistoryahanay man kami. Pero talagsa man gid hay hurungdun man gid gani.

Ang ana bata nga si Jacob ginadara na lang rugya sa balay kon weekend. Kon kaisa si Michael gabuol kana. Daw bata ko man gid rian hay ginapalangga ko man kag ginapakaun sa balay. Pirme man gid sa balay kag kon hambalan ko gapati. Kon kaisa mabalbal ko ang buli na. Gatuwad man gid ria nga ginatugro buli na para balbalun ko. Daw bala sipal lamang ang akun pagbalbal hay ginapa-count ko kon pira edad na, amo man ria ka numero ang balbal sa buli na. Kang segundo grado pa lang katu ako man ang nakadiskubre nga may diabetes dya nga bata hay pirme lang bukas ka refrigerator ko kag mag-inom. Halin pa kang sa kinder o 1st grado tana kon sa balay nagasipal sa agut ko. Akun man gid ginsugid sa amiga ko kag anda ginpadoktor para ma-check. Husto man gid ako, may diabetes kag dapat gid pagatatapun kang insulin nga bulong para sa dugo na nga indi magtaas ukon magnaba. Akun man gid tana ginatatap kon sa balay ko hay kuon ko kana “Indi ko gusto nga mapatay ikaw sa balay ko.” Makadlaw kag magkupkop lang man gid ria balik kanakun. Kapin pa rugya tana pirme sa balay ko nagaturog. Kon kaisa hambalan ko na lang nga tak-an run ako kana. Te, mauli na lang ria tana. Kuon ka amiga ko gani daw ako pa ang nanay na hay gusto na rugya kanamun kag pirme busog eh. Duro man nga Kinaray-a nga hambal man-an na: magbugto, taas, putot, tambok, maniwang, guwapo ako, palangga ko ikaw kag iba pa nga. Indi malipatan nga magamit kag mahambal kon magkitaay ukon makaagto sa balay. Hasta kadya makayuhom lamang ako. Sa kolehiyo run sanda. Kon kaisa gasorpresa lamang bisita rugya sanda kanakun. Kanami lang hay ang mga bata halin kang magagmay kon ginapalangga mo sanda indi nanda ikaw malipatan. Ginakahidlawan nanda ako. Rugya gahapit sanda bag-o mag-uli sa balay nanda. Ako ang ginauna nga makita kag ginapangamusta ka akun mga bata rugya sa Wales, Maine. Bisan nga wara rugya ang akun kagurangnan kag agut nga bata daw parehas man nga nakita ko sanda nga darwa ilabi na gid ang akun agut kon makabisita ang ana mga amigo kanakun kag makakupkop kag makahambal nga “Palangga ko ikaw.”

Salamat gid sa Ginuo sa akun amiga nga Colleen kag sa ana pamilya. Salamat sa gugma kang Dios nga ginapaambit na kanakun kag kanamun tanan paagi sa regalo kang pag-abyanay.