Pa-Boston, Massachusetts kami sa Logan International Airport. Mga tatlo ka oras ang biyahe halin sa balay kag depende man gid sa trapik, mas ukon kulang sa tatlo ka oras. Naghapit kami sa Cumberland Farms sa pagbuta kang tangke. Bag-o magpadalagan pa-highway Interstate 95 pa-Boston, naghapit kami sa Dunkin Donuts para sa kape kag lemon tea. Pasado alas onse, sa I-95, padalagan sakay sa sarakyan, lima ka istasyonan kang toll pay ang amun gin-agyan halin sa Androscoggin County, Maine. Maagyan man gid ang New Hampshire pa-Boston. Duro ang mga road work; ang 70 mph nangin 25-45mph lang sa padalagan ka sarakyan. Mayad wara kami ti naagyan nga aksidente. Salamat sa Ginuo.
Tungod nga nami ang adlaw kag masanag, nami man maglantaw-lantaw sa mga maagyan nga lugar kag manarisari nga mga sarakyan. Nalingaw man ako mamati sa manami nga mga kanta sa radio. Sanday Matt kag Chelsea nakaturog. Pagbugtaw it alas dose kag nagutom kami, nagkaun kami kang balon nga siopao. Sa Piscatagua River Bridge run kami sa Kittery, Maine. Pihak na kadya ang Portsmouth, New Hampshire. Welcome to New Hampshire! hasta sa Welcome to Massachusetts! kag sa Boston run kami.
Ay abaw, tatlo ka beses magtalang ang akun bayaw sa pagliko pa-Logan Airport bisan pa nga may GPS! Kun indi mo gid man kabisado ang dalanun, bisan may GPS, ma-stress ikaw sa pagpangita. Kapin pa ang syudad sobra ka kiput, duro mga sarakyan, kag may No Fault Car Insurance ang State, amo nga ang mga driver naga-andam gid. Alas dos y media run kami nag-abot sa Logan Airport. Dapat nga sa husto ‘kaw gid nga terminal hay kon malampasan mo, budlay mag-exit liwan. Pabalik-libot sa amo nga paradahan. Tapos namun magbuol ka tiket para sa parking, lima kami nagguwa magpanaw nga may ginaguyod. Rayu pa ang amun ginapanw para sa terminal kang DELTA. Kang mag-elevator kami ni Inday, sus, nakalab-ot kami sa pinakadalum nga parking kay ginhulat namun nga magbukas lang; wara namun mapindut kon diin kami maagto. Te, nagpa-restroom kami kag ginsagap ang pabalik sa terminal ka Delta. Nagpamangkot gid man ako ka direksyon sa nagapanglimpyo.
Pagkatapos sakay balik sa elevator, pagguwa namun, nakita namun kon diin ang tatlo nagahulat. Ginaguyod pa namun ni Inday ang i-carry on nanda. Nagpalitrato kami kag magpaalam. Wara pa anay kami tamun nga tatlo magbalik sa parking. Naghulat pa kami. Ako gid, nagabantay sa paglantaw sa marayu samtang ga-check-in dun sanda para sa security check. Ginabantayan ko gid hay basi indi madara ang mga tinapay nga akun pabalun kananda. Basi indi pagsugtan, kundi madara ko pabalik. Salamat nga okey man, kag indi magutuman ang darwa sa biyahe hay darwa pa ka stop over sanda.
Sa amun pagbalik liwan nga tatlo, halin sa Logan Airport, kisra gilang kami magtalang pagguwa sa Main Street. Nagtawag pa ako kay agut, hay 20 mins na-delay andang flight. Kang sa South Portland dun kami, naghapit kami sa Cabela’s Scarborough, tapos sa Sam’s para sa karan-un kag irimnun. Hasta sa Lowe’s, tapos sa Hongkong Asian Market kag sa amun pag-agi sa Lisbon, nagpa-Big Apple kami anay para sa pagbuta liwan kang tangke, kag nag-uli sa Wales. Sa kabilugan mga 80 kilometros ang distansya halin sa Logan Airport pauli sa balay.
Alas dyes sa gabii run kami mag-abot sa balay. Dayon pungko ni bayaw sa recliner kag magpahilot ka kahig na kanakun. Ginhilot ko man akun pakaisa pagkatapos ko hilot kay bayaw nga naturugan sa pagpahuway na, antes ruman mag-drive pauli sa andang balay sa Turner. Salamat sa Ginuo, luwas kami sa ano man nga katalagman. Dayawun ang Ginuo; mga alas dos ti aga, nagtawag si agut nga rugtu run sanda nakaabot sa Laguna Beach sa California. Daw kahapon lang ang tatlo ka bulan nga bakasyon nanda rugya sa New England, Maine.
Balay Sugidanun 