Kon Wala Ka

Ni JP ANTHONY CUÑADA

Kon wala ka
Ang pagsinugilanon kaangay
sa pagsakay sa salakyan
nga wala kariton.
Masadya ini sa mga bata
nga nagahampang

apang indi sa mga tigulang
bangud luyag naton
may malab-ot nga doog.
Maskin sa diin nga doog
nga masarangan lab-oton
sang gasolina, sumsuman,
ilimnon ukon kahulogbon.

Ang pagtipon sang imo mga abyan
ginabulag sang kalinong nga malapad pa
sa antad sang dagat
sang imo ginahamtangan.

Ngaa ang mga tinaga
nga kon makalab-ot man
sa punta sang dila,
nagapabilin nga nagaalungayngay didto?

Wala ang kahagpok
sang imo kadlaw
nga daw hilaw nga mangga
nga makapaagay sang laway.

Para kay Alberto Edzel Sualog