Nalantaw ko ang Hurt Locker ni Kathryn Bigelow, diin tana una nagdaug kang Best Director, pinakauna man sa mga babaye. Dya ang link kang nasulat ko nga na-inspire na:https://balaysugidanun.com//?s=ang+hurtlocker+sa+kinaray-a
Controversial dyang Zero Dark Thirty bangud sa waterboarding. Sangka istilo sa pag-torture nga ginagamit kang military para makabuol kang impormasyon. Sa istorya kang pelikula, sa pagtultol kang balay sa Pakistan diin nagaistar si Bin Laden, amo nga napatay kang mga soldado nga Amerikano kang 2011. Amo nga duro ang nagakontra: indi luyag ibandera, ukon ipamatud-an, nga ginahimo dya kang America, kag epektibo.
Kundi labi nga na-curious ako, luwas nga nominee man para sa Best Picture, Best Actress, kag Best Original Screenplay sa Oscars.
Curious man ako kun ano ang akun mangin reaksyon. Basi indi ako ka-agwanta?
Pulido ang paghimo kang eksena. Makarilingaw ang dalagan kang istorya bangud gusto mo masundan paano gid man bala nanda natultol ang balay, paano gindakup/patay si Osama bin Laden, kag rugyan ang mga detalye kang kapalpakan kag pagduda nga nagapakita kang dinamiko kang gahum sa sulod kang CIA kag angut sa iba pa nga ahensya kang gobyerno.
Lingaw man bangud sa bida nga baye, si Maya (Jessica Chastain). Gwapa, aram, pokus sa obra, kag isug. Memorable ang eksena diin gin-isip na pira run ka adlaw nanda nadiskubre ang balay pagkatapos wara gihapon it opisyal nga aksyon anang mga boss.
Wara it detalye nahanungod sa anang personal nga background, halimbawa childhood ukon lovelife ukon pamilya. Nalikawan ka pelikula mangin sikolohikal. Para sa iba, kakulangan dya. Para kanakun, okey lang. Bug-at run nga daan ang tema. Nasiplatan ko man sa pira ka diyalogo ang kahuyang kang mga karakter kag ang kakapoy nanda.
Nakuntento takun sa pagpokus sa aksyon, sa mga hitabo, paagto sa resolusyon kag katapusan. Labaw sa tanan, bangud baye ang bida kag direktor. Kag sagad gid, sagad.
Balay Sugidanun 