“Ang monologue kang tipulo sa likuan” ni Mike Orquejo

Ang monologue kang tipulo sa likuan
Mike Orquejo

psst…
ehem. ehem.
psst.. psst…psst…
migs, migs …balikid anay
huod, ako dya ang nagahambal
pamati anay bisan makadali lang. indi magdalagan. wara ako gapangaun
ginhawa kang madalum.
ahhhh
te, pwede run?
dali, pungko anay dya ay sa gamut ko nga nagagataw
kulbaan kaw gid haw? wara dya ah, daw sa others kaw
amo kaw man gihapon, talawit gid.
ahay. may isugid daad ako kanimo, kun ok lang.
ok lang? salamat.
kilala mo si Iping?
ang tawo bla nga maniwang nga nagpasemento kang balay na dyan ay sa gulod.
huod, dan tana gid.
man-an mo migs, hambal na ipasinso na kanu ako sa rum-an
himuon na kano ako nga trasis kang balay kang bata na nga nakapamana kang obersis
mal-am run kano ako kag nami pa akon tamanyo.
perpek.
ginsaylo na run gani kano ang tamaho nga nagabalay rudya
didto ka bubog sa pihak sapa
ginpaobrahan na run kahapon kay Jaime
kita mo raay pa gani ang ibos nga tapul nga ginkuyang -kuyang nanda kahapon
nasubuan gid ako migs
mahidlaw gid ako sa mga taga Timbuok
indi ko run makita ang mga bata nga nagadaralgan kun hapon
hadlukan nga maabutan kang orasyon sa likuan
ikaw gid ang pinakadasig katong gamay kaw pa nga wara ti puroy kag tap-ingun
hay, kasubo
duro pa daad akun storya
garing daw gadali kaw man
uhud, nagaparamuti kaw run kag nagakudog pa imo nga baba
te sige, salamat sa pagpamati
naghagan-hagan gawa pamatyag ko
hasta sa liwat
kun maabutan mo pa ako sa rum-an nga nagatindog

____________________
Taga-Caridad, Hamtic, Antique kag nag-eskwela sa: Hamtic Central School, Baguio City National High School, kag UP in the Visayas sa Miag-ao, Iloilo diin tana nagtapos kang BA Sociology-Economics. Naga-obra tana kadya bilang Research Assistant sa proyekto kang UP Visayas parte sa mangrove reforestation.

Mahilig tana sa linapwahan. Naga-blog man tana kag kamaan kang basic search engine optimatization (SEO) kag nasadyahan gid sa google.

Litrato: “Ang Kahoy nga Tipulo” ni Mike Orquejo
Scientific name: Artocarpus Incisa

Trivia: Ginhalinan kang ngaran kang Antipolo City parehas nga duro sa atun kabarangayan kag banwa ang napangaranan halin sa mga kahoy kag tanum nga na(g) atubo sa dyang lugar. Hasta nag-abot ang panahon nga naislan sa ngaran kang mga bantog nga tawo.