Laragway ang titulo kang bag-o nga album kang Original Kinaray-a Music (OKM) ni Nonong Egida nga gin-prodyus kang Binirayan Records kang Disyembre 2012.
“Laragway” man ang titulo kang una nga kanta sa 10 ka track. Ginkanta dya ni Lindsay Hernaez.
Pamilyar ako sa dyang kanta bangud isara si Nonong sa ginakabig nga Tatay kang OKM sa probinsya kang Antique. Dyang “Laragway” ang mahambal ko nga vintage Nonong Egida, amo nga wara it duda nga angay gid man dya mangin titulo kang album.
Ginsundan dya kang “Patadyong kang Kabuhi” nga ginsulat ni Nonong kaimaw si Felicia “Acay” Flores, amo man ang “Bata kang Pangako” kaimaw si Remy Muescan sa lapat kang musika ni Noel TaboTabo kag pagkanta nanday Ramah Egida, Dawn Hernandez, Gail Karl Hernaez, kag Lindsay Hernaiez. May liriko man si Nonong kaimaw si Randy Tacogdoy, ang “Pagbulaganay,” nga ginkanta ni Noel Pechon.
Luwas sa “Laragway,” paborito ko ang “Gugma Mo Lang” nga sa ika-9 sa album. I-klik dyang link para mapamatian sa SoundCloud. Makita n’yo man ang link sa tuo nga bahin, sa Pamati-i sa SoundCloud nga Menu.
Libre ang pamati pero indi pwede ma-download bangud copyrighted. Buligan natun atun mga lokal nga kompositor kag musikero paagi sa pagbakal kang album. 150.00. May mga kopya sa LG Laundry Shop sa Bantayan, San Jose, Antique. Sa binit gid dya ka karsada, sa tunga-tunga kang Saint Anthony’s College (SAC) kag Gaisano. Natultulan ko gid kang makauli ako kadyang una nga semana kang Septyembre.
Binayle akun nadumduman sa pagpamati sa bilog nga album. Kag basi nami man tirawan sa sunod ni Nonong mag-pop. Hulatun ko dya.
Balay Sugidanun 