Sa Lawak nga Ngitngit ni Jessrel Gilbuena

Sa Lawak nga Ngitngit
–alang ni Jelly

Day, tan-awa sa ko.
Ayaw ko’g talikdi
Kay nag-atubang ko nimu

Naa koy hangyo nimu.
Pwede ba ko nimung dal-on sa imong lawak?

Naa man gud koy nadunggan nga
itom daw ang kolor niini.
Aduna pa gyud daw kay TV didto nga invisible.
Puro nindot daw ang salida, fairytale
Nga matod pa, imong dunggan ray makakita

Kuyawa ana gud!

Asa man na dapit inyong balay ba?
Paadtua ko bi,
Kay gusto pud nako nga mapriso anang kangitngit.
Hayag man kayo diri sa gawas gud,
Daghan kaayo ko’g bati nga masaksi.
Ang kahayag kay sakit kaayo sa mata,
Unya ang mga panghitabu, hilom ra
Dili halos makita sa dunggan
Ah, pero grabiha lagi, banha kayo
Dungog gud sa akong mga mata

Adto na ta day,
Gusto na pud ko makasuwat ug balak
Nga hinubad gikan sa imong kangitngit

Ug tan-awon nato unya
Kung asa ang mas nindot,
Ang ako bang lawak nga hayag
O kanang imuha nga ngiob.

___________________

Jessrel E.Gilbuena was born in Santa Fe, Bantayan Island, Cebu. He is a language student at Cebu Normal University where he is the Cebuano editor of the school publication. He loves poetry and an active member of some creative writing group in Cebu.