Skip to content

Posts from the ‘BLOGS’ Category

5
Apr

COVID-19 Binalaybay ni Analie Ollague Cabrillos

Strawberry kang Aningalan, San Remegio, Antique | Litrato ni Pangga Gen

Binalaybay ni Analie Ollague Cabrillos 

Wara gid tana pag-panic buying sa balay,
Daw wara lang sa kilag ni Nanay,
“Kay, ‘di ‘kaw magkabalaka may langka dya sa puno gabitay”
Kag sangka gantang nga monggo akun ilangkay.

May gasuba man nga aloy rudya sa iraya,
Singkwenta pesos ang kilo diin ‘kaw pa?
Kon wara wara ron gani ang manok nga nagalakwatsa,
Amo ra iyawun kag palapawan sabaw para may bilin pa pagka-aga.

Katiraw man bay kita kauna ka habus-habus.
Nadumduman n’yo kauna gakaun man kamo kayus?
Tinig-ang nga mais wara n’yo untati hasta maubos,
kag sinabawan nga dahon kamote nga may kadyus.

Importante nga buta kang bugas ang lata,
Kag mamulad paray para may ipagaling pa,
Kinahanglan nga kita mangin handa,
Basta may lugawun solbar ron busong ta.

Amo tana ra eksakto gid nga paminsarun
Wara gasarig sa iba para may karan-un
Kay kita nabuyo ron nga maghimakas para sa kaugalingon,
Kag wara nagahulat kon ano man ang rasyon.

Nadumduman mo ang istorya kang Tibakla kag Subay?
Wara nagauntat ka pangita kang pagkaun kag wara nagapahuway,
Amo ra kon obra mo panumbalay sa pihak balay,
Sapwan timu nga wara tirig-angun hay ginauna ang pag-usik ka laway.

Basta sa uma gani timo naga-uli,
pag abot ka mga trahedya wara ‘kaw pagbangon ka suli,
Ang importante nga ikaw buhi,
kag kon ano gani hambal ka Opisyal ka Gobyerno kag Health Worker “MAMATI!”

Pero sa tuod-tuod lang ang amo dya nga epidemya,
Nagapamatuod ang nabasahan ko sa Bibliya,
Amo ra igaampo natun ang kabuhi ta,
Sa Diyos nga dalangpan kang tanan nga problema.

Mga Laswa sa Uma | Litrato ni Faith Laurio

__________________________

Dyang binalaybay una nabalhag sa Facebook kang tagsulat kang Marso 21, 2020. Si Analie Olague Cabrillos taga-Tribidae, San Remegio, Antique.