Skip to content

Posts from the ‘STEPHEN LOUIE CHECA’ Category

7
Dec

Si Migo Beloy, ang anang estatwa kag ako kag iba pa nga binalaybay

James Singlador
NI STEPHEN LOUIE R. CHECA

Si Migo Beloy, ang anang estatwa kag ako

Migo Beloy naman- an mo bala
Nga luyag ko mangin kaangay kang estatwa mo sa plaza?

Naima gid takun kang estatwa mo nga wara gareklamo
Sa uran, init linog kag bagyo
Kag sa pihak kang mga naga labay nga mga delubyo
Sa gihapon ang dagway mo,galaum kang pagbag-o-
Daw parehas lang nga kaimaw namun sa gihapon
Ang buhi mo nga mga damgo sa mga piningas kang kahapon
Sa diin wara it kahadluk kaw nga nagpakigbato
Lamang amun maangkun, handum kang tagipusuon.

Daad Migo Beloy salsalun man ang akun butkun
Agud sa pagbayaw kang paghidaet, indi ako pagkapuyon.
Bisan pa nga ang akun palibot nagapabulag-bulag
Sa senyales kang paghiusa nga nangin imo apa nga panawag,
Kabay nga kaangay kang imong estatwa, padayon ko nga ipabutyag
Kamatuoran nga bisan ang gahum kang bala indi makarumpag.

Migo Beloy kairima man bala ang wara’t katuyuhon
Nga pag imaw mo kada gabie sa mga ipot-ipot kag bituon
Amo man ang pagpanaksi mo sa imong idalum
Kang mga sumpa kang nagahigugma nga natuman kag nagburuka-
Kaangay kang pagpamaalam kang akun mga pinalangga
Sa diin, sa gihapon ginalauman ko nga magabalik kag maga butwa
Daw handum ko nga ikaw man magabangon
Agud kami tudluan kang nakita mo nga kamatuoran
Pagkatapos mo kalagun ang mga sakun kag nagapasipala.

Ugaring Migo Beloy man-an ko nga indi run kaw magbalik
Kanamun nga padayon galaum nga makabati kang imong mga hutik
Buligi run lang kami nga maintyindihan nga labaw sa tanan
Ang handum nga kaaraydan para sa karakuan
Kga bukut ang sulud kang amun lang burugasan
Paagi sa diyang handumanan kang imong pagkabaganihan
Tudlui kami sa pagpasad kag pagpadayon kang imo gin umpisahan
Kag daad, ako, bisan kang estatwa mo lang kun mangin kaangay mo man.

Pagpamaghut

gamaghut ako
sa kanyogan kang gugma;

tuba halin kanimo
akun ginakalangkagan.

tuman ang akun pagbalik-balik
sa pagtakras sa sagapra mo nga lawas
kag tarum nga papha
bagay nga nagapailig kang dugo
sa batiis kag dapa-dapa.

ang imo mga giding
gasalugsog kang akun mga alima-
nagkibulun tungud
kang mga turumanun sa kabuhi;
bukun angay kang tapok
ko nga baratyagun-
ginpagabok kang mga tuktuk,
dalitan nga tunuk
kang kasingkasing.

bisan padayon ako
gaantos sa kasakit,
pagsaka-naug sa lantiyog nga puno,
indi ko mapunggan ang paghandum
kang imong lahin kag butung
kapin pa kang tam-is nga tuba
halin sa suwak
kang imo kaanyag-
akun lamang maangkun
kun ako magapadayon.

Panguhit ka bituon

Natak-an run takun
ka panguhit ka mga bitoon
kag itugro kanimo;
gina uyangan mo lang;

ang pinangabudayan ko
gintugro mo sa iba;
nagapangalipay tinyo
samtang ako,gapanghakruy
sa kasakit kag kakapoy
kang akun balikawang kag dughan;
darwa lang tinyo nagsipal
kang akun mga bitoon
kag pati bulan ko luyag mo pa bul-un.
Nami timo ba!
Umpisa kadya
indi run takun manguhit para kanimo
kag antes mapuas ang andang mga igpat,
tirawan ko man manguhit para sa iban-
maima gid ‘kaw
hay sa amo to nga tiyempo
kiraw run imo.

Advertisements
24
Oct

Kalipay kang gin-angga ni Stephen Louie Checa

Dayaw sa MYH Private Resort, Culasi, Antique

Kulang ang mga metapora kag tinaga
Agud maipahayag ko ang kalipay
Nga naglikup sa akun dila kag kasingkasing
Kang tion nga ako ginsabak kag gin-angga mo

Ayhan kaangay mo si Mararisun
Nga nagparayu agud pangitaun ang kahilwayan
Ukon sangka kubus nga gatahod kay Madyaas
Ang imong dungganun nga ginikanan?

Tawga ako nga bulahan; sa imong pagtatap
Natirawan ko magpatunga sa galantawanay nga paraiso
Sa diin ang paghinalup kag yuhum kang adlaw
Nangin mas mabulawanun sa imong luyo

Ang mga baras kang imong daray-ahan
Kag ang gasinipal nga mga kabataan sa nagatika nga kasisidmun
Gapadumdum kanakun kang indi maisip nga mga damgo
Kag handum nga pagatumanun sa imong pagpanaksi

Ang imong mga balud kaangay kang sutil ko nga baratyagun;
Wara ginakapoy sa pagharuk sa imong kabatuhan
Kag paghulat kang pinalangga nga nagpanglugayawan sa marayu
Samtang ginasaysay kang hangin ang wara paglubad nga mga paglaum

Nagbutlak run ang adlaw kang atun pagbulagay
Ugaring gakudug ako sa karamig kang kasubu-
Ang wara it suruklan mo nga katahum,katawhay kag pagtatap
Paga-islan kang mga handumanan kag kahidlaw lamang

Ugaring sa pihak kang umalagi ko nga pagparayu
Paga ugduk ko sa tagsa mo ka pinusod kag sa akun tagipusoon ang pangako
Nga lantawun ko liwan ang pagsinaot kang mga pispis sa imong hunasan
Kag magabalik ako sa pagpamati kang matam-is mo nga ili-ili.

Kasiyahan ng isang minahal
Papuri sa MYH

Kulang ang mga talinhaga at salita
Upang ipahayag ang kasiyahan
Na namuo sa aking dila’t damdamin
Sa mga panahong ako’y iyong inaruga at minahal

Maihahambing ba kita kay Mararisun
Na lumayo upang hanapin ang kalayaan
O sa isang nagpapakumbaba at gumagalang kay Madyaas
Na dakila mong magulang?

Tawagin mo akong pinagpala; sa iyong pag-aruga
Naranasan ko mapagitna sa nagtititigang mga paraiso
Kung saan ang takipsilim at ang ngiti ng araw
Ay naging mas ginintuan sa iyong paglingap

Ang mga buhangin sa iyong dalampasigan
At ang mga batang naglalaro sa pagsilip ng dapithapon
Ay nagsisilbing paalala sa akin ng mga di mabilang na mga pangarap
At mga naising pilit tutuparin sa iyong pagsaksi

Ang iyong mga alon ay kasing kulit ng aking pagsinta;
Di napapagod sa kahahalik sa iyong mga kabatuhan
At paghintay ng isang minamahal na pansamantalang nagpaalam
Habang sinasaad ng hangin ang walang kupas na pag-asa

Sumikat na ang araw ng ating paghihiwalay
Ngunit ako’y nanginginig sa ginaw ng kalungkutan-
Ang walang sukat na ganda, katahimikan at pag-aruga
Ay mapapalitan na lang ng mga alaala at pangungulila

Ngunit sa kabila ng minsang kong paglayo
Itatanim ko sa iyong pusod at sa aking puso ang pangako
Na muli kong panonoorin ang pagsayaw ng mga ibon sa iyong katihan
At babalik ako upang muling pakinggan ang matamis mong ili-ili.