Ang Aswang Kag Si Paok

NI LINDA ARNAEZ-LEE
(Salamat sa pag-edit ni Jose Edison C. Tondares)

Sa sangka baryo nga ginapalibutan kang kabanglidan, may ginabantog nga sangka aswang. Ginakuno nga tagsa abot kang kasisidmun nagatuhaw dya agud mamagat sa buhi, sa unahan ayon kang kanyugan.

Duro ang ginahadlukan mag-agi sa buhi kay basi ilambatan kang aswang. Gani, bag-o pa magsirum, nakauli run ang tanan sa andang mga balay.

Nakaabot dya nga huring-huring kay Fausto Di Makautot nga ginakilala sa alyas nga “Paok Maoy”, sangka 35 anyos nga laon, nga bangud masami lang nagamaoy wara ti may naluyag magpamana kana. Timprano pa nagabauk run kang bahal si Paok imaw kang mga manuggarab kag mananggiti sa kanyugan. Alas tres pa lang sa hapon, lingin run ang maoy nga laon.

“Ano nga aswang-aswang man. Pati takun kara!” Hambal ni Paok samtang nagatagay kang bahal.

“Ay, tuod tana ra Bay! May nagapamagat nga aswang dyan sa buhi. Nagkarabitas gani kuno ang smagul ni Bay Birin sa sobra nga palagyo kang nag-agi sanda dyan halin sa bilasyon,” ang hambal ni Mado Mananggiti.

“Bayi kuno kag labug ang buhok!” Saligbat ni Godoy nga sangka mananggiti man.

“Bayi? Mayad gali to pangasaw-un eh! Hahaha!” Nagkirinadlaw sanda tanan.

Si Paok Maoy, wara ti ginakahadlukan kon lingin. Aber pa kon aswang. Testingan na gid kuno kon sa diin gid kutub ang kasupug kang ginabantog nga aswang.

Pag-abot kang kasisidmun, nagdakan-dakan si Paok sa buhi para bantayan ang aswang. Naghapa tana sa lupa kag nagpakuno-kuno nga patay. Burubhay, may nagtiktik. Dyan run ang aswang! Nakita na si Paok nga nagahapa sa lupa. Ginparapitan na si Paok kag gintuduhan pa gid ang tiktik. Pero wara nagahulag si Paok. “Siguro bag-o lang dya nabugtuan kang ginhawa hay mainit-init pa,” ang pensar kang aswang.

Ginhakwat kang aswang ang kahig ni Paok. Ginpasarika na sa anang likod kag gin-guyod. Nayudyud ang pungyahon kag ulo ni Paok sa lupa. Wara gihapon naghulag si Paok. Nag-agi sanda sa kabatohan, sa taramnanan kag sa kawayanan, pero wara gihapon naghulag si Paok. Wara na ginsapak ang mga sakit nga agi kang mga bato kag siit. Gusto na pamatud-an kon tuod gid bala nga masupug dyang aswang.

Sa unahan, may sangka kudal nga kawayan. Kang ginlakad kang aswang ang kudal, nagpangyaput si Paok sa kudal. Indi makahalin ang aswang. Natingala. Basi nasab-it lang. Gintuduhan na butung ang kahig ni Paok pero hugut man ang pangyaput ni Paok sa kudal. Indi kadaug ang aswang. Gintuduhan na pa gid pagbutung. Nagburun-a ang aswang ka butung kay Paok.

Si Paok, natam-an run gid kayugit sa aswang nga indi makadaug magbutung kana. Sa sobra na nga pugung kang anang karadlawun, nag-utot si Paok! Nagasigabong kag makasuruka ang utot ni Paok. Nahangyos ang aswang! Paglaum na patay run ang anang ginaguyod. Nagkuyampad ang ginabantog sa kasupug nga aswang, samtang si Paok ginaparamalhas kag naumpawan sa sobra nga kadlaw sa aswang. “Hadluk man lang gali sa utot!”

Umpisa kato, wara run namagat ang aswang kag si Fausto Di Makautot alyas Paok Maoy gintawag run sa ngaran nga Fausto Parautot alyas Paok Utot.

***Tapos***